Home » சட்டம் & அரசியல் » நூற்றாண்டிற்குப் பிறகு கிழக்கில் மறைந்த சூரியன்

நூற்றாண்டிற்குப் பிறகு கிழக்கில் மறைந்த சூரியன்

மெரினா கடற்கரையில் 21 குண்டுங்கள் முழங்க முழு அரசு மரியாதையுடன் திமுக தலைவர் கருணாநிதியின் உடல் நல்லடக்கம் செய்யப்பட்டது.

👤 Saravana Rajendran8 Aug 2018 3:21 PM GMT
நூற்றாண்டிற்குப் பிறகு கிழக்கில் மறைந்த சூரியன்
Share Post

காவேரி மருத்துவமனையில் சிகிச்சை பெற்று வந்த கருணாநிதி 7-ஆம் தேதி மாலை 6.10 மணியளவில் காலமனார். அவரது உடல் சென்னை ராஜாஜி அரங்கில் பொதுமக்கள் பார்வைக்கு வைக்கப்பட்டது.

நரேந்திர மோடி, எடப்பாடி பழனிசாமி, ஓ. பன்னீர் செல்வம், மத்திய அமைச்சர் நிர்மலா சீதாராமன், காங்கிரஸ் தலைவர் ராகுல் காந்தி, குலாம் நபி ஆசாத், சரத் பவார், கேரள முன்னாள் முதல்வர் உமன் சாண்டி, ஆந்திர முதல்வர் சந்திரபாபு நாயுடு, தெலங்கானா முதல்வர் சந்திரசேகர ராவ், கர்நாடகா முதல்வர் ஹெ.டி. குமாரசாமி, மேற்கு வங்க முதல்வர் மம்தா பானர்ஜி உள்ளிட்ட தலைவர்கள் கருணாநிதி உடலுக்கு இறுதி அஞ்சலி செலுத்தினர்.

இன்று மாலை 4 மணியளவில் கருணாநிதியின் உடல் முப்படை அணிவகுப்புடன் ராணுவ வாகனத்தில் ஏற்றப்பட்டு, சிவனாந்தா சாலை, காமராஜர் சாலை ஆகியவற்றின் வழியாக ஊர்வலமாக எடுத்துவரப்பட்டு அண்ணா நினைவிடம் வந்தடைந்தது.

அந்த ஊர்வலத்தில் திமுக தொண்டர்கள், பொதுமக்கள் என ஆயிரக்கணக்கோர் பங்கேற்றனர். தங்களது தலைவனுக்கு இறுதியாக புகழஞ்சலி செலுத்து விதமாக வாழ்க... வாழ்கவே... என முழக்கம் எழுப்பினர். இதனால் சென்னையே அதிர்ந்தது.

தொடர்ந்து, அண்ணா நினைவிடம் வந்தடைந்த கருணாநிதி உடலுக்கு முன்னாள் பிரதமர் தேவ கவுடா, மத்தியமைச்சர் பொன். ராதாகிருஷ்ணன், ஆளுநர் பன்வாரிலால் புரோஹித் மற்றும் சில குடும்பத்தினர் மலர்வளையம் வைத்து அஞ்சலி செலுத்தினர்.

பிறகு திமுக செயல் தலைவர் ஸ்டாலின், மு.க. அழகிரி, செல்வி செல்வம், ராஜாத்தி அம்மாள், கனிமொழி, உதயநிதி ஸ்டாலின், தயாநிதி மாறன், கலாநிதி மாறன் உள்ளிட்ட குடும்பத்தினர் கருணாநிதி உடலின் காலைத் தொட்டு கண்ணீர் மல்க அஞ்சலி செலுத்தினர்.

முப்படைகளின் இசைக்கருவி முழங்க கருணாநிதி உடலில் போர்த்தி இருந்த தேசிய கொடி ராணுவ வீரர்களால் முறைப்படி அகற்றி ஸ்டாலினிடம் கொடுக்கப்பட்டது. பிறகு சந்தனப்பேழைக்குள் கருணாநிதியின் உடல் வைக்கப்பட்டு நல்லடக்கம் செயப்பட்டது.

வாழ்நாள் முழுவதும் மக்களின் நலனுக்காக ஓய்வில்லாமல் உழைத்த கருணாநிதியின் உடல் அண்ணா நினைவிடத்தில் நீங்கா துயிலுற்றாலும் மக்கள் மனதில் என்றும் அழியாப் புகழுடன் நிலைத்து இருப்பார்.