Home » உலகச் செய்திகள் » அமெரிக்கா - ஈரான் பிளவு: இந்தியாவுக்கு 5 சிக்கல்கள்

அமெரிக்கா - ஈரான் பிளவு: இந்தியாவுக்கு 5 சிக்கல்கள்

அமெரிக்க அதிபர் டொனால்ட் ட்ரம்ப் ஈரான் நாட்டுடன் போடப்பட்ட அணுசக்தி ஒப்பந்தத்தை ரத்துசெய்வதாக...

👤 Saravana Rajendran9 May 2018 4:55 PM GMT
அமெரிக்கா - ஈரான் பிளவு: இந்தியாவுக்கு 5 சிக்கல்கள்
Share Post

அமெரிக்க அதிபர் டொனால்ட் ட்ரம்ப் ஈரான் நாட்டுடன் போடப்பட்ட அணுசக்தி ஒப்பந்தத்தை ரத்துசெய்வதாக அறிவித்துள்ளதால் இந்தியாவுக்கு புதிய சிக்கல்கள் ஏற்பட்டுள்ளது.
2015ஆம் ஆண்டு பராக் ஒபாமா அமெரிக்க அதிபராக இருந்தபோது ஈரானுடன் அமெரிக்க அணுசக்தி ஒப்பந்தத்தில் கையெழுத்திட்டது. இதனால் இந்தியா உள்ளிட்ட உலக நாடுகளுடன் அமெரிக்காவுக்கு இருந்த விலகல் போக்கு முடிவுக்கு வந்தது.
ஆனால், நேற்று அமெரிக்க அதிபர் டொனால்ட் ட்ர்ம்ப் ஒபாமா கையெழுத்திட்ட அணுசக்தி ஒப்பந்தத்தை ரத்துசெய்வதாக அறிவித்துவிட்டார். இதனை அறிவித்ததும், "டொனால்ட் ட்ரம்ப்புக்கு பிரச்னைகளை கையாள்வதற்கு போதிய மதிநுட்பம் இல்லை" என்று ஈரான் எதிர்வினையாற்றியுள்ளது. அமெரிக்கா – ஈரான் இடையேயான இந்த பிளவு இந்தியாவையும் சில முக்கிய சிக்கல்களில் மாட்டிக்கொள்ள வைத்திருக்கிறது.
சபாஹர் துறைமுகம் ஒப்பந்தம்: இந்தியா – ஈரான் இடையே கையெழுத்தாகியுள்ள சபாஹர் துறைமுக ஒப்பந்தத்தில் இந்தியா இதுவரை 500 மில்லியன் டாலர் வரை முதலீடு செய்துள்ளது. ஈரானின் ஓபன் வளைகுடா பகுதியில் சபாஹர் துறைமுகம் உருவாகி வருகிறது. இது பாகிஸ்தானும் சீனாவும் இணைந்து பாகிஸ்தானில் அமைத்துள்ள க்வடார் துறைமுகத்திலிருந்து 85 கி.மீ. தொலைவில் அமைய உள்ளதால், இந்தியா பாகிஸ்தானைத் தவிர்த்துவிட்டு ஆப்கானிஸ்தான் மற்றும் பிற மத்திய ஆசிய நாடுகளை அணுக வழி ஏற்படும். சபாஹர் துறைமுகத்தின் முதல்கட்ட கட்டுமானப் பணிகள் கடந்த ஆண்டு டிசம்பர் மாதம் தொடங்கப்பட்டன. இத்துறைமுகத்தின் ஒரு பகுதியை இந்தியா அடுத்த 18 மாதங்களுக்கு கையாளலாம் என்ற ஒப்பந்தமும் கடந்த பிப்ரவரி மாதம் கையெழுத்தாகியுள்ளது. ஆனால், பாகிஸ்தான் இந்தியாவுக்கு வர்த்தகப் போக்குவரத்தை தடை செய்துள்ளதால், இந்தியா, ஆப்கானிஸ்தான், ஈரான் இடையே சபாஹர் துறைமுகம் வழியாக மேற்கொள்ளப்படும் வர்த்தகத்தை ஈரான் கைவிடும் சூழல் உருவாகியுள்ளது.
கச்சா எண்ணெய் விலை: உலக அளவில் கச்சா எண்ணெய் இறக்குமதியில் இந்தியா 3வது இடத்தில் உள்ளது. இந்தியாவுக்கு கச்சா எண்ணெய் வழங்கும் நாடுகளின் வரிசையில் 3வது இடத்தில் உள்ள ஈரான். ஈரான் தவிர ஈராக், சவுதி அரேபியா ஆகிய நாடுகளிலிருந்தும் இந்தியா கச்சா எண்ணெய் இறக்குமதி செய்கிறது. ஈரானிடமிருந்து பெறும் கச்சா எண்ணெய்க்கான விலையை இந்தியா ஐரோப்பிய வங்கிகளின் வாயிலாக யூரோக்களாக செலுத்துகிறது. அமெரிக்காவின் முடிவால், ஈரான் கச்சா எண்ணெய் விலை அதிகமாக உயர்த்த வாய்ப்புள்ளது. இதனால் இந்தியா கடுமையாக பாதிக்கப்படும். ஏற்கெனவே, கச்சா எண்ணெய், நிலக்கரி மற்றும் எரிவாயு ஆகியவற்றின் விலை இந்த ஆண்டு 20% உயரும் என்று உலக வங்கி கணித்துள்ளது. இவை அனைத்தும் ஒருங்கே இணைவதால், இந்தியா பணவீக்க உயர்வு, அன்னிய செலாவணி மதிப்பில் வீழ்ச்சி ஆகியவற்றை எதிர்கொள்ள நேரும். விளைவாக இந்தியாவின் மொத்த உள்நாட்டு உற்பத்தி (GDP) சரியக்கூடும்.
நான்கு நாடுகளுடன் இந்தியாவின் உறவு: ஒபாமா ஈரானுடன் அணுசக்தி ஒப்பந்தத்தைக் கையெழுத்திட்டது அமெரிக்கா, இஸ்ரேல், சவுதி அரேபியா, ஆகிய நாடுகளிடையே இந்தியாவின் உறவை பலப்படுத்தியது. டொனால்ட் ட்ரம்ப் எடுத்திருக்கும் ஒப்பந்த முறிவு முடிவை சவுதி அரேபியாவும், இஸ்ரேலும் பாராட்டியுள்ளன. இந்த விஷயத்தில் இந்த நான்கு நாடுகளுடனும் நட்புறவு வைத்திருக்கும் இந்தியா என்ன செய்யப்போகிறது? அமெரிக்காவின் முடிவை மற்ற இரு நாடுகளைப் போலவே ஆதரிக்கப்போகிறதா? அப்படியானால், ஈரானுடன் இந்தியாவின் உறவு மோசமாகும். அமெரிக்காவின் முடிவைக் கண்டித்தால், அமெரிக்கா மட்டுமின்றி இஸ்ரேல் மற்றும் சவுதியின் அதிருப்தியையும் சம்பாதிக்கும். நான்கு நாடுகளின் உறவிலும் பாதிக்காத வகையில் இந்தியா என்ன செய்யப்போகிறது?
பிராத்திய உறவின் தாக்கம்: இந்தியா அமெரிக்காவை ஆதரிக்கும் பட்சத்தில் ஈரானுடன் இந்தியாவின் உறவு வலு இழக்கும். அப்போது, சீனாவும் அதன் கூட்டாளியான பாகிஸ்தானும் ஈரானுடன் கைகோர்க்கும். ஏற்கெனவே, ட்ரம்ப்பின் அறிவிப்பை முன்கூட்டிய எதிர்பார்த்திருந்த ஈரான் சீனா மற்றும் பாகிஸ்தானை சபாஹர் துறைமுகக் கட்டுமானத்தில் பங்குகொள்ள அழைப்பு விடுத்துள்ளது. எந்த காரணத்திற்காக இந்தியா சபாஹர் துறைமுக ஒப்பந்தத்தில் இணைந்ததோ அதற்கு குந்தகம் விளைவிக்கும் ஈரானின் முடிவு இந்தியாவை அதிர்ச்சி அடைய வைத்துள்ளது. நேபாளம், இலங்கை மற்றும் மாலத்தீவுகள் பகுதியில் சீனாவின் ஆதிக்கம் அதிகமாகியுள்ள சூழலில் ஈரானுடனான உறவையும் இந்தியா சீனாவிடம் பறிகொடுக்க விரும்பாது.
ஷாங்காய் ஒத்துழைப்பு அமைப்பு: ஈரானை ஷாங்காய் ஒத்துழைப்பு அமைப்பில் சேர்ப்பதற்கு சீனா முயற்சி வருகிறது. அவ்வாறு நடைபெறுமானால், அந்த அமைப்பை அமெரிக்கா தங்களுக்கு எதிரான நாடுகளின் கூட்டணியாக பார்ப்பதற்கு வாய்ப்புள்ளது.