ஹிஸ்புல்லா தடுத்து வைக்கப்பட்டமைக்கு ஆலோசனைகளை வழங்கியவர் சுரேஷ் சலே - சட்டத்தரணி நுவான் போபகே
எதுவாயினும், நீதிமன்றத்தில் முறைப்படி விசாரணைகளை மேற்கொண்டு குற்றவாளிகளுக்கு தண்டனை வழங்கப்பட வேண்டும்.
உயிர்த்த ஞாயிறு தாக்குதல் குறித்த விசாரணை என்ற பெயரில் முன்னெடுக்கப்படும் அரசியல் நாடகங்கள், பாதிக்கப்பட்டவர்களுக்கு நீதியை பெற்றுக்கொடுப்பதுவுக்குப் பதிலாக, அரசியல் இலக்குகளை அடைவதையே நோக்கமாகக் கொண்டுள்ளதாக சட்டத்தரணி நுவான் போபகே சுட்டிக்காட்டியுள்ளார்.
தனது உத்தியோகபூர்வ முகநூலில்; 09-06-2026அன்று கருத்து பதிவேற்றியதன் போதே மேற்கண்டவாறு தெரிவித்தார்.
அவர் தனது முகநூல் பதிவில் மேலும் தெரிவித்துள்ளதாவது: சலேவின் ஆலோசனையின் பேரில் ஹிஜாஸ் ஹிஸ்புல்லா இந்தத் தாக்குதலின் மூளையாகச் செயற்பட்டவர் என்று கூறி கைது செய்யப்பட்ட போது, அவரது மனைவி ஒரு மாத கர்ப்பிணியாக இருந்தார்.
உலகில் சிறந்த புலனாய்வுப் பிரிவுகள் என்று எதுவும் இல்லை. பனிப்போர் காலத்தில் சோவியத் ஒன்றியத்துக்கு எதிராக அல்கொய்தா அமைப்புக்கு அமெரிக்காவின் மத்திய புலனாய்வு அமைப்பு நிதியுதவியையும், இராணுவப் பயிற்சியையும் வழங்கியது. இறுதியில், அல்கொய்தா அமைப்பு செப்டம்பர் 11 தாக்குதலை நடத்தும் போது, அது தொடர்பான முற்கூட்டிய எச்சரிக்கைகளை சி.ஐ.ஏ அமைப்பு புறக்கணித்திருந்தது. அந்தத் தாக்குதலைப் பயன்படுத்தி ஆப்கானிஸ்தான் மற்றும் மத்திய கிழக்கு நாடுகளில் இஸ்லாமிய எதிர்ப்பு உணர்வுகளுடன் இராணுவ ரீதியாகத் தலையீடு செய்வதற்கு அமெரிக்கா வழிவகுத்துக் கொண்டது. இறுதியில் கொல்லப்பட்டது அமெரிக்காவின் சாதாரண மக்களும், மத்திய கிழக்கு பிராந்தியத்தின் அப்பாவி மக்களுமேயாகும். அதேபோல, மொசாட் போன்ற புலனாய்வு அமைப்புகள் உலகில் மோதல்களை உருவாக்குவதற்கும், இனப்படுகொலைகளை நிகழ்த்துவதற்கும், பொருளாதாரப் படுகொலைகளைச் செய்வதற்கும் திட்டமிட்ட விதம் குறித்த விடயங்கள் நூல்களாகவே பதிவாகியுள்ளன.
இலங்கையின் புலனாய்வுப் பிரிவுகளிலும் பெரிய மாற்றம் எதுவுமில்லை. 88-89 காலப்பகுதியில் மக்கள் விடுதலை முன்னணிக்கு (ஜே.வி.பி) இருந்த மக்கள் ஆதரவைச் சிதைப்பதற்காக, மக்கள் விடுதலை முன்னணி உறுப்பினர்கள் போல வேடமிட்டுச் சாதாரண மக்களைக் கொன்றது இந்த புலனாய்வுப் பிரிவினர்தான். யுத்த காலத்தில் மக்களை கடத்திக் காணாமல் ஆக்கியதும், கப்பம் பெற்றதும் இவர்களே. காணாமல் ஆக்கப்பட்டவர்களுக்கு எதிராகப் போராடிய லலித், குகன் ஆகியோரைக் காணாமல் ஆக்கியதும், வசந்த முதலிகேயைத் தடுத்து வைத்திருந்ததும் இவர்களே.
எனது நினைவுகள், சட்டத்தரணி ஹிஜாஸ் ஹிஸ்புல்லா 2020 ஆம் ஆண்டு கைது செய்யப்பட்டு பயங்கரவாதத் தடைச் சட்டத்தின் கீழ் தடுத்து வைக்கப்பட்ட சம்பவத்துக்குச் செல்கின்றன. அந்தச் செயற்பாட்டிற்கு முழுமையான ஆலோசனைகளை வழங்கியவர் அப்போதைய புலனாய்வுப் பிரிவுத் தலைவரான சுரேஷ் சலே ஆவார். அந்தச் சம்பவத்தின் போது, 2020 ஆகஸ்ட் மாதம் கொழும்பு கோட்டை நீதவான் நீதிமன்றத்தில் அப்போதைய நீதவான் ரங்க திசாநாயக்க முன்னிலையில் விடயங்கள் சமர்ப்பிக்கப்பட்டன.
அன்றும் இன்றும் போல அரசாங்கத்துக்காக ஆஜராவது திலிப்ப பீரிஸ் ஆவார். அவர் அன்றும் இன்றும் போல நீதிமன்றத்தில் உரக்கக் கூறி, உயிர்த்த ஞாயிறு தாக்குதலின் மூளையாகச் செயற்பட்டவர் சட்டத்தரணி ஹிஜாஸ் ஹிஸ்புல்லா என்று வாதிடுகிறார். மட்டக்குளிப் பகுதியில் கல்வி வசதியற்ற குழந்தைகளுக்குப் படிப்பிக்கும் புத்தளத்தில் அமைந்துள்ள பாடசாலையொன்றின் முகாமைத்துவக் குழுவில் ஹிஜாஸ் அங்கத்தவராக இருந்ததையே அடிப்படையாகக் கொண்டு அவர் இந்தத் தாக்குதலுடன் தொடர்புடையவர் என்ற கதையைக் கட்டியெழுப்பினர். ஹிஜாஸ் யார் என்பது தெரிந்த எமக்கு இந்தக் கதை ஒருபுறம் நகைப்பை ஏற்படுத்தியது, மறுபுறம் பெரும் கவலையை தந்தது.
அன்றும் இன்றும் அரசுக்கு ஒருவரை மூளையாகக் காட்டி முன்னிறுத்த வேண்டிய தேவை இருந்தது. அது ஒரு அரசியல் தேவை. தற்போதும் அதே போன்றதொரு நாடகம் அரங்கேறுகிறது. ஆனால், அன்று திலிப்ப பீரிஸிக்கு ஆலோசனை வழங்கிய சலே, இன்று நடைபெறும் நாடகத்தின் பிரதான கதாபாத்திரமாக மாறியுள்ளார். சலேவு ஏன் ஒருவரை மூளையாகக் காட்ட வேண்டிய தேவை இருந்தது என்ற கேள்வி, இந்த சம்பவத் தொடர் மீது அவருக்கு ஏதோ ஒரு தொடர்பு இருக்குமோ என்ற சந்தேகத்தை எமக்கு ஏற்படுத்தியது. தேசியவாதிகள் சலேயைச் சுத்தப்படுத்த முயற்சித்தாலும், அவர்கள் அரச தேவைக்காகவே கூலிப்படையாகச் செயற்பட்டவர்களே.
எதுவாயினும், நீதிமன்றத்தில் முறைப்படி விசாரணைகளை மேற்கொண்டு குற்றவாளிகளுக்கு தண்டனை வழங்கப்பட வேண்டும். அது சலேவா அல்லது யாராக இருந்தாலும் அது முக்கியமல்ல. ஆனால், அது மீண்டும் ஒரு அரசாங்கத்தின் அரசியல் பிரச்சாரத்துக்காக அன்றி, உண்மையான பாதிக்கப்பட்டவர்களுக்கு நீதி கிடைப்பதை நோக்கமாகக் கொண்டே நடைபெற வேண்டும்.
உயிர்த்த ஞாயிறு தாக்குதல் தொடர்பான வழக்கு தற்பொழுது மூவரடங்கிய நீதவான் குழாம் முன்னிலையில் நடைபெறுகிறது. அதில் 21 சந்தேகநபர்கள் உள்ளனர். உயிர்த்த ஞாயிறு தாக்குதலின் குற்றவாளிகளுக்குத் தண்டனை வழங்கப்பட வேண்டும் என்பதில் நாம் அனைவரும் உறுதியாக உள்ளோம். ஆனால் அது காடு நீதியின் அடிப்படையில் நடைபெறக்கூடாது. மூவரடங்கிய நீதவான் குழாம் முன்னிலையில் நடைபெறும் வழக்கில் 25,000 குற்றச்சாட்டுகள் உள்ளன.
2,500 சாட்சியங்கள் உள்ளனர். ஆனால், உயர் நீதிமன்றம் வழங்கிய தீர்ப்பின் விளைவாக பெரும்பாலான சந்தேகநபர்களுக்கு சட்டத்தரணி பிரதிநிதித்துவம் மறுக்கப்பட்டுள்ளது. 'வோயர் டயர்' எனப்படும் வாக்குமூலங்கள் சுயாதீனமாக வழங்கப்பட்டனவா என்பதைக் கண்டறியும் விசாரணையில், அவை சுயாதீனமானவை என்பதை சந்தேகநபர்களே நிரூபிக்க வேண்டும் என்ற விசித்திரமான உத்தரவு பிறப்பிக்கப்பட்டுள்ளது. அரசாங்கம் அதனை நிரூபிக்க வேண்டிய நிலையில், சட்டத்தரணி பிரதிநிதித்துவம் இல்லாத சந்தேகநபர்கள் இந்தச் சிக்கலான சட்ட விடயங்களுக்குத் தாங்களாகவே முகங்கொடுக்க வேண்டிய நிலை ஏற்பட்டுள்ளது.
இவற்றில் எந்தவொரு சம்பவத்துடனும் தொடர்பற்ற ஒருவர் கூட இதில் இருக்கக்கூடாதா? 'சஹ்ரான் அழகாகப் பிரசங்கம் செய்கிறார்' என்று கேட்டுச் சென்ற, எவ்வித பயங்கரவாத நோக்கமும் இல்லாத ஒருவர் கூட இதில் இருக்க வாய்ப்பில்லையா? இதனால்தான் இயற்கை நீதியின் கோட்பாடு உள்ளது. இதனால்தான் அரசியலமைப்பிலும் எந்தவொரு சந்தேகநபருக்கும் சட்டத்தரணி மூலம் ஆஜராகும் உரிமை வழங்கப்பட்டுள்ளது. இதனால்தான் அரசியலமைப்பில் நிரபராதி என கருதப்படும் தத்துவம் கட்டியெழுப்பப்பட்டுள்ளது. இவை அனைத்தையும் தலைகீழாக மாற்றியே சில வழக்குகள் நடைபெறுகின்றன.
இந்த நாடகங்களால் இறுதியில் மக்களுக்கு நீதி கிடைக்காது என்பது மாத்திரமல்ல, உயிர்த்த ஞாயிறு தாக்குதலால் பாதிக்கப்பட்டவர்களுக்கும் உரிய நீதி கிடைக்காது. ஏனெனில் கத்தோலிக்க மக்களுக்கோ அல்லது பாதிக்கப்பட்ட மக்களுக்கோ தேவையானது யாரையாவது ஒருவரை மூளையாகக் காட்டுவதல்ல, உண்மையான குற்றவாளிகளுக்குத் தண்டிப்பதேயாகும். அதை ஒரு நியாயமான, நேர்மையான வழக்கு விசாரணையால் மட்டுமே செய்ய முடியும். மாறாக, ஒப்பந்த அடிப்படையில் நீதிமன்றத்துக்கு இலக்குகளை வழங்குவதோ, அந்த ஒப்பந்தங்களை நிறைவேற்றுவதற்காக நீதிமன்ற அதிகாரிகளுக்கு மறைமுகமாக இலஞ்சம் கொடுப்பதோ நடைபெறக்கூடாது. சட்டம் நடைபெறுவது மட்டும் போதாது, அது நடைபெறுவது வெளியில் தெரியவும் வேண்டும்.
இந்த அரசாங்கத்துக்கு ஏனைய அரசாங்கங்களைப் போலவே இத்தகைய விடயங்கள் குறித்த நியாயமான, விஞ்ஞானபூர்வமான வாசிப்பு இல்லை என்பது தற்பொழுது உறுதியாகி வருகிறது. துரதிர்ஷ்டவசமான விடயம் என்னவென்றால், இந்த அரசாங்கத்துக்கு தலைமை தாங்கும் மக்கள் விடுதலை முன்னணியானது, பயங்கரவாதத் தடைச் சட்டம் மற்றும் புலனாய்வுப் பிரிவுகளின் செயற்பாடுகள் காரணமாக வரலாற்றில் கடுமையான அடக்குமுறைக்கு உள்ளான ஒரு கட்சியிருந்தும், இத்தகைய விடயங்கள் நடைபெறுவதுதான். சலே உள்ளிட்ட அன்றைய அரசுகள் பயங்கரவாதத் தடைச் சட்டத்தைப் பயன்படுத்தும் போதும், தற்போது அநுர இதைப் பயன்படுத்தும் போதும், நீதிக்கும் நிறைவேற்று அதிகாரம் இடையில் உள்ள இடைவெளி காரணமாகவே நாம் எதிர்ப்பைத் தெரிவிக்கிறோம். சலே, பயங்கரவாதத் தடைச் சட்டத்துக்கு எதிரான முகாமிற்கு வருவதையிட்டு நாம் மகிழ்ச்சியடைவோம். அரசாங்கம் அந்த முகாமுக்கு வரும் வரை நாம் போராடுவோம்.
