லண்டன் - கொழும்பு நேரடி விமான சேவை ஒக்டோபரில் ஆரம்பம்
ஒக்டோபர் முதல் வசந்த காலம் வரை கொழும்புக்கு ஒரு புதிய நேரடிப் பாதை இருப்பது மகிழ்ச்சியளிக்கிறது என்றார்
2026 குளிர்காலப் பருவத்தை முன்னிட்டு, இலங்கையின் சுற்றுலாத் துறையை மேம்படுத்தும் வகையில் லண்டன் கேட்விக் மற்றும் கொழும்பு இடையே நேரடி விமான சேவைகளைத் தொடங்கவுள்ளதாக பிரிட்டிஷ் எயார்வேஸ் அறிவித்துள்ளது.
தனது விரிவாக்கப்பட்ட குளிர்கால அட்டவணையின் ஒரு பகுதியாக, எதிர்வரும் ஒக்டோபர் 23ஆம் திகதி கொழும்புக்கான விமான சேவைகள் தொடங்கும் என்றும், வாரத்திற்கு மூன்று முறை இந்த விமானங்கள் இயக்கப்படும் என்றும் அந்த நிறுவனம் உறுதிப்படுத்தியுள்ளது. ஐக்கிய இராச்சியம் மற்றும் இலங்கை இடையே நேரடித் தொடர்பை வழங்கும் இந்த விமான சேவை குளிர்காலப் பருவம் முழுவதும் தொடரும்.
இந்த முன்னேற்றத்தை வரவேற்றுள்ள இலங்கைக்கான பிரிட்டிஷ் உயர்ஸ்தானிகர் ஆண்ட்ரூ பேட்ரிக், இந்த நடவடிக்கை பிரிட்டிஷ் சுற்றுலாப் பயணிகளுக்கும் இலங்கையர்களுக்கும் சாதகமான செய்தி என்று குறிப்பிட்டுள்ளார்.
இது குறித்து அவர் கூறுகையில், குளிர்காலப் பருவத்திற்காக பிரிட்டிஷ் சுற்றுலாப் பயணிகளுக்கும் இலங்கையர்களுக்கும் கிடைத்துள்ள ஒரு நற்செய்தி இதுவாகும். முன்னர் பயணங்களில் பல இடையூறுகள் இருந்தன. இந்நிலையில் ஒக்டோபர் முதல் வசந்த காலம் வரை கொழும்புக்கு ஒரு புதிய நேரடிப் பாதை இருப்பது மகிழ்ச்சியளிக்கிறது என்றார்
மத்திய கிழக்கின் சில பகுதிகளில் ஏற்பட்டுள்ள இடையூறுகளுக்கு பதிலளிக்கும் வகையில் விமான நிறுவனங்கள் தங்கள் வலைப்பின்னல்களைச் சீரமைத்து வரும் நிலையில், உலகளாவிய பயணத் தேவை மற்றும் மாறிவரும் பயண முறைகளுக்கு மத்தியில் இந்த வழித்தடம் அறிமுகப்படுத்தப்படுகிறது.
கடற்கரைகள், வனவிலங்குகள், கலாச்சாரம் மற்றும் உணவு வகைகளுக்குப் பெயர் பெற்ற இலங்கைக்கு பயணிகள் எளிதாகச் செல்வதற்கு இந்த வழித்தடம் உதவும் என்றும், அதே நேரத்தில் சுற்றுலாத் துறையின் மீட்பு முயற்சிகளுக்கு இது ஆதரவாக அமையும் என்றும் பிரிட்டிஷ் எயார்வேஸ் தெரிவித்துள்ளது.
இந்த விமான சேவைகள் போயிங் 777 (Boeing 777) ரக விமானங்களைப் பயன்படுத்தி இயக்கப்படும். மூன்று வகுப்பு இருக்கை வசதிகள் இருக்கும். இந்த விரிவாக்கம் பிரிட்டிஷ் ஏர்வேஸின் 2026 குளிர்கால வளர்ச்சித் திட்டத்தின் ஒரு பகுதியாகும். இத்திட்டம் அதன் நீண்ட தூர விமான வலைப்பின்னலில் ஒன்பது சதவீத அதிகரிப்பையும், பல முக்கிய சுற்றுலா வழித்தடங்களில் கூடுதல் இடவசதியையும் உள்ளடக்கியுள்ளதாகத் தெரிவிக்கப்பட்டுள்ளது.
