கொச்சி ஜெப ஆலயத்தின் அருகே தீ வைத்த இளைஞர் கைது
சம்பவத்தை தனது கைப்பேசியில் காணொளியாகப் பதிவு செய்துவிட்டு அவர் அங்கிருந்து தப்பிச் சென்றதாகவும் கூறப்படுகிறது.
கொச்சியில் உள்ள யூதர்களின் ஜெப ஆலயத்தின் முன்புறத்தில் அமைந்துள்ள குழந்தைகள் காப்பகத்திற்குத் தீ வைத்ததாக 32 வயது இளகினார் ஒருவர் கைது செய்யப்பட்டுள்ளார். யூதர்களின் வழிபாட்டுத் தலத்தை இளைஞர் கொண்ட இந்த தீவைப்பு சம்பவத்தின் பின்னணியில் பன்னாட்டுப் பயங்கரவாத தொடர்புகளும் விரிவான சதித்திட்டமும் இருக்கக்கூடும் எனக் காவல்துறையினர் சந்தேகிக்கின்றனர்.
கைது செய்யப்பட்ட எபின் பால், எர்ணாகுளத்தைச் சேர்ந்தவர். ஜெப ஆலய அறக்கட்டளையால் நடத்தப்படும் ப்ளாசம் நர்சரி (Blossom Nursery) என்ற குழந்தைகள் காப்பகத்தின் மீது அவர் பெட்ரோலை ஊற்றித் தீ வைத்ததாகக் கூறப்படுகிறது. அக்டோபர் 12ஆம் தேதி அதிகாலை சுமார் 2.30 மணியளவில் இச்சம்பவம் நிகழ்ந்துள்ளது. சம்பவத்தை தனது கைப்பேசியில் காணொளியாகப் பதிவு செய்துவிட்டு அவர் அங்கிருந்து தப்பிச் சென்றதாகவும் கூறப்படுகிறது.
கைது செய்யப்பட்டவரின் கைப்பேசி மற்றும் இணையவழி உரையாடல்களை முதற்கட்டமாக ஆய்வு செய்ததில், வெளிநாட்டுத் தொடர்புகள் இருப்பதாக சந்தேகிக்கப்படும் நபர்களுடனும் பல்வேறு இணையவழிக் குழுக்களின் உறுப்பினர்களுடனும் அவர் தொடர்பில் இருந்தது தெரியவந்ததாகக் கூறப்படுகிறது. நாடு முழுவதும் உள்ள பல்வேறு நகரங்களில் யூதர்களின் வழிபாட்டுத் தலங்கள் மற்றும் அவற்றின் மீது நடத்தப்படக்கூடிய தாக்குதல்கள் குறித்து அந்தச் செய்திகள் குறிப்பிடுவதாகவும் தெரிவிக்கப்படுகிறது.
இந்தச் சம்பவத்துக்கு சர்வதேச தொடர்புகள் உள்ளனவா என்பது குறித்து விசாரணை நடைபெற்று வருவதாகக் காவல்துறையினர் தெரிவித்துள்ளனர். பயங்கரவாதத் தொடர்பு உள்ளதா என்ற கோணத்திலும் விசாரணை நடைபெற்று வருவதாகச் செய்தி நிறுவனமான பிடிஐ தெரிவித்துள்ளது. எனினும், இந்தக் கோணம் இதுவரை உறுதியாக நிரூபிக்கப்படவில்லை.
