மக்கா மசூதியில் ஒழுக்கக்கேடான செயல்களில் ஈடுபட்டதாக இரு வங்க தேசத்தினருக்கு மரண தண்டனை நிறைவேற்றம்
இஸ்லாமிய சட்டத்தின் கீழ் நீதிமன்றத்தின் விருப்பத்திற்குட்பட்ட தண்டனை வகையான தஅஸீர் (Ta'zir) அடிப்படையில் மரண தண்டனை விதிக்கப்பட்டதாகத் தெரிவிக்கப்பட்டுள்ளது.
மக்காவில் உள்ள ஒரு மசூதியில் ஒழுக்கக்கேடான செயல்களில் ஈடுபட்டதாக குற்றஞ்சாட்டப்பட்ட வங்கதேசத்தைச் சேர்ந்த நாசெருல் இஸ்லாம் அப்துல் பசீர் மற்றும் சிட்டி அக்தர் ஆகிய இருவருக்கும் மரண தண்டனை நிறைவேற்றப்பட்டுள்ளதாக சவூதி அரேபிய உள்துறை அமைச்சகம் அக்டோபர் 14 அன்று அறிவித்தது. இருவரும் கைது செய்யப்பட்டு, குற்றஞ்சாட்டப்பட்டு, இஸ்லாமியச் சட்டத்தின் கீழ் நீதிமன்றத்தின் விருப்பத்திற்குட்பட்ட தண்டனை வகையான தஅஸீர் (Ta'zir) அடிப்படையில் மரண தண்டனை விதிக்கப்பட்டதாகத் தெரிவிக்கப்பட்டுள்ளது.
அவர்கள் ஈடுபட்டதாக கூறப்படும் செயல்களின் தன்மை மற்றும் கைது தொடர்பான விரிவான விவரங்கள் வெளியிடப்படவில்லை. இத்தகைய வழக்குகளில் இஸ்லாமிய சட்டத்தை நடைமுறைப்படுத்துவதில் தனது உறுதிப்பாட்டை சவூதி அரேபியா மீண்டும் வலியுறுத்தியுள்ளது. இதுகுறித்து வங்கதேச அரசு இதுவரை பொதுவெளியில் எந்த கருத்தையும் தெரிவிக்கவில்லை.
இந்தச் சம்பவம், சவூதி அரேபியாவின் மரண தண்டனை நடைமுறைகள் தொடர்பாக சர்வதேச அளவில் தொடர்ந்து எழுந்துவரும் கவனத்தையும் விமர்சனங்களையும் மீண்டும் முன்னிலைப்படுத்தியுள்ளது.
