இந்தியா உடனடியாக உதவிக்கரம்
'தித்வா' சூறாவளி காரணமாக பதிவாகிவரும் கடும் மழைவீழ்ச்சி மற்றும் கிழக்கு, மத்திய மாகாணங்கள் உள்ளடங்கலாக நாட்டின் பல்வேறு பாகங்களில் வீசும் வலுவான காற்றின் காரணமாக வீடுகள், கடைகள் மற்றும் முக்கிய உட்கட்டமைப்பு நிர்மாணங்கள் என்பன பெருமளவுக்கு சேதமடைந்துள்ளன.
இந்திய அரசாங்கத்தின் அறிவுறுத்தலின்கீழ் இலங்கைக் கடற்பரப்பில் தரித்து நிற்கும் ஐ.என்.எஸ்.விக்ராந்த் மற்றும் ஐ.என்.எஸ்.உதயகிரி ஆகிய கப்பல்கள் ஊடாக சீரற்ற காலநிலையினால் பாதிக்கப்பட்டுள்ள மக்களுக்கு அவசியமான உடனடி நிவாரண மற்றும் மனிதாபிமான உதவிப்பொருட்கள் வழங்கிவைக்கப்பட்டுள்ளன.
இந்த உடனடி உதவி வழங்கல் குறித்து இலங்கையிலுள்ள இந்திய உயர்ஸ்தானிகரகத்தினால் வெளியிடப்பட்டுள்ள அறிக்கையில் மேலும் கூறப்பட்டிருப்பதாவது:
வங்காள விரிகுடாவில் இலங்கை கடற்கரைக்கு அருகில் ஏற்பட்ட காற்றழுத்தத் தாழ்வு மையம் நேற்று முன்தினம் (27) 'தித்வா' சூறாவளியாக வலுப்பெற்றமை மற்றும் நேற்று முன்தினம் மண்சரிவு ஏற்பட்டமை ஆகியவற்றுடன் இலங்கை தொடர்ச்சியாக வெள்ளம் மற்றும் மண்சரிவுக்கு முகங்கொடுத்திருப்பதாகவும், பல மாவட்டங்களில் அத்தியாவசிய சேவைகள் தடைப்பட்டிருப்பதாகவும் அறியமுடிகின்றது. 'தித்வா' சூறாவளி காரணமாக பதிவாகிவரும் கடும் மழைவீழ்ச்சி மற்றும் கிழக்கு, மத்திய மாகாணங்கள் உள்ளடங்கலாக நாட்டின் பல்வேறு பாகங்களில் வீசும் வலுவான காற்றின் காரணமாக வீடுகள், கடைகள் மற்றும் முக்கிய உட்கட்டமைப்பு நிர்மாணங்கள் என்பன பெருமளவுக்கு சேதமடைந்துள்ளன.
எனவே இந்நெருக்கடியினால் தோற்றுவிக்கப்பட்டுள்ள உடனடி மனிதாபிமானத் தேவைப்பாடுகளைப் பூர்த்திசெய்யும் நோக்கில், பாதிக்கப்பட்ட குடும்பங்களுக்கான உடனடி மனிதாபிமான மற்றும் அனர்த்த நிவாரண உதவிகள் இந்திய அரசாங்கத்தினால் ஏற்பாடு செய்யப்பட்டுள்ளன. இந்தியாவின் 'சாகர் பந்து' திட்டத்தின் கீழேயே மேற்படி நிவாரண உதவி வழங்கல் நடவடிக்கைகள் முன்னெடுக்கப்பட்டுள்ளன.
அதன்படி தற்போது வழங்கப்பட்டுள்ள உதவிகளில் 4.5 தொன் உலர் உணவுப்பொருட்கள், 2 தொன் ஏனைய உணவுப்பொருட்கள், உடன் உணவுப்பொதிகள், பால் மற்றும் வெதுப்பக உற்பத்திப்பொருட்கள், குடிபானங்கள் மற்றும் குடும்பங்களின் தேவைகளைப் பூர்த்திசெய்யக்கூடிய ஏனைய போசணைப்பதார்த்தங்கள் என்பன உள்ளடங்குகின்றன. அவற்றுடன் ஏனைய அத்தியாவசியப்பொருட்களும் இலங்கை அதிகாரிகளிடம் கையளிக்கப்பட்டுள்ளன.
இவ்வுதவிகள் தற்போது இலங்கைக் கடற்பரப்பில் தரித்து நிற்கும் ஐ.என்.எஸ்.விக்ராந்த் மற்றும் ஐ.என்.எஸ்.உதயகிரி ஆகிய இந்திய விமானந்தாங்கிக் கப்பல்கள் ஊடாக வழங்கப்பட்டுள்ளன.
தற்போதைய கடினமான சூழ்நிலையில் இலங்கை மக்களுடன் இந்திய உடன்நிற்கிறது. 'அயலகத்துக்கு முதலிடம்' எனும் கொள்கையின் பிரகாரம் இவ்வேளையில் இலங்கைக்கு ஆதரவளிப்பதற்கு இந்தியா தயாராக இருக்கிறது. இந்நிலைவரம் தீவிரமடையும் பட்சத்தில் இலங்கை அரசாங்கத்துடன் ஒருங்கிணைப்பை ஏற்படுத்தி அடுத்தகட்ட உதவிகள் தொடர்ந்து வழங்கப்படும் என அவ்வறிக்கையில் குறிப்பிடப்பட்டுள்ளது.
