வட,கிழக்கு முழுவதும் மாவீரர்களுக்கு அஞ்சலி
வட,கிழக்கில் உள்ள மாவீரர்களின் துயிலும் இல்லங்களெங்கும் கொட்டும் மழையையும் பொருட்படுத்தாமல் பொதுமக்கள் அணிதிரண்டு உணர்வெழுச்சியுடன் தமது அஞ்சலிகளை மேற்கொண்டனர்.
தமிழினம் தன்மானத்துடன் தலைநிமிர்ந்து வாழ்வதற்கான சத்திய இலட்சி விடுதலைப் போரட்டத்தில் தமது உயிர்களை வித்தாக்கிய வீர மறவர்களை நினைவுகூரும் மாவீரர்கள் நாள் 26-11-2025 அன்று தமிழர் தாயகமான வடக்கு, கிழக்கு எங்கும் நினைவுகூரப்பட்டது.
இதன்போது, வட,கிழக்கில் உள்ள மாவீரர்களின் துயிலும் இல்லங்களெங்கும் கொட்டும் மழையையும் பொருட்படுத்தாமல் பொதுமக்கள் அணிதிரண்டு உணர்வெழுச்சியுடன் தமது அஞ்சலிகளை மேற்கொண்டனர்.
முன்னதாக, மாவீரர்கள் நாளை முன்னிட்டு நண்பகலுக்கு பின்னர் அத்தியாவசிய சேவைகள் தவிர்ந்த ஏனைய அனைத்து செயற்பாடுகளையும் கைவிட்டு பொதுமக்கள் மாவீரர்களை அஞ்சலிப்பதற்காக அணிதிரளுமாறு அந்தந்த பிரதேசங்களுக்கு பொறுப்பாக உள்ள மாவீரர்கள் நாள் ஏற்பாட்டுக் குழுவினரால் பகிரங்கமான கோரிக்கை விடுக்கப்பட்டிருந்தது.
அதற்கு அமைவாக, நேற்று நண்பகலுக்கு பின்னர் அதிகமான வர்த்தக நிலையங்கள் பூட்டப்பட்ட நிலையில் மாவீரர் துயிலுமில்லங்களில் பொதுமக்கள் மாலை ஐந்தரை மணியிலிருந்தே ஒன்றுகூடி ஆரம்பித்திருந்தனர்.
பின்னர் 6.05 மணியளவில், நினைவொலி எழுப்பபட்டதோடு, ஒரு நிமிட அகவணக்கத்தை அடுத்து, 6.07 மணியளவில் பொதுச்சுடர் ஏற்றப்பட்டது. தொடர்ந்து ஏனைய சுடர்கள் ஏற்றப்பட்டு துயிலுமில்லப்பாடல் ஒலிக்கப்பட்டதோடு மலரஞ்சலியும் செலுத்தப்பட்டது.
யாழ்ப்பாணம்
யாழ்.மாவட்டத்தில் வலிகாமம் கோப்பாய் மாவீரர் துயிலுமில்லம் வடமராட்சி கிழக்கு உடுத்துறை மாவீரர் துயிலுமில்லம், தன்மராட்சி கொடிகாமம் மாவீரர் துயிலுமில்லம், வடமராட்சி எள்ளங்குளம் மாவீரர் துயிலுமில்லம், தீவகம் சாட்டி மாவீரர் துயிலுமில்லம் ஆகியவற்றில் மாவீரர்களுக்கான அஞ்சலி செலுத்தப்பட்டது.
இதனைவிடவும், நல்லூரில் உள்ள திலீபனின் நினைவுத்தூபிக்கு அருகில் அமைக்கப்பட்டுள்ள மாவீரர்களின் நினைவகத்திலும் அஞ்சலி நிகழ்வுகள் முன்னெடுக்கப்பட்டிருந்தன.
விடுதலைப் புலிகள் அமைப்பின் கப்டன் பண்டிதரின் தாயார் பொதுச் சுடர் ஏற்றி வைக்க, சம நேரத்தில் ஏனைய சுடர்கள் ஏற்றி வைக்கப்பட்டு, 'தாயகக் கனவுடன் சாவினைத் தழுவிய சந்தனப் பேழைகளே' என்ற துயிலும் இல்ல கீதம் ஒலிக்கப்பட்டது.
முதற்போராளிக்கு அஞ்சலி
முன்னாள் பாராளுமன்ற உறுப்பினர் எம்.கே.சிவாஜிலிங்கம் யாழ்ப்பாணத்தின் பல இடங்களில் மாவீரர்களுக்கு சுடர் ஏற்றி மலர்தூவி அஞ்சலி செலுத்தினார்.
விடுதலைப் போராட்டத்தின் முதல் மாவீரர் சங்கருக்கு கம்பர்மலையால் உள்ள அவரது இல்லத்தில் அஞ்சலி செலுத்தினார். இதன்போது சங்கரின் தயார் வல்வெட்டித்துறை முன்னாள் நகரசபை உறுப்பினர் க.சதீஸ் உள்ளிட்டோர் கலந்துகொண்டனர்
இதனை தொடர்ந்து குட்டிமணி மற்றும் தங்கத்துரை ஆகியோருக்கும் அஞ்சலி செலுத்தினார். பின்னர் நல்லூரிலுள்ள தியாக தீபம் திலீபனின் நினைவுத்தூபியிலும், மாவீரர்களின் பெயர் பொறிக்கப்பட்ட கல்வெட்டு அமைந்துள்ள நினைவாலயத்திலும் சுடர் ஏற்றி மலர் தூபி அஞ்சலி செலுத்தியுள்ளார்.
இதன்பின்னர் கோப்பாய் மாவீரர் துயிலுமில்ல வளாகத்தில் இராணுவத்தின் படைமுகாம் அமைக்கப்பட்டுள்ளதால் இராணுவ முகாம் முன்பாக அஞ்சலி செலுத்தப்பட்டது.
வவுனியா
வவுனியாவின் ஈச்சங்குளம் மாவீரர் துயிலுமில்லத்திற்கு அருகில் உள்ள வெற்றுக்காணியில் மாவீரர்களுக்கான அஞ்சலி நிகழ்வுகள் நடைபெற்றிருந்தன. இதில் மவீரரின் தாயொருவர் சுடரேற்றி வைக்கவும் அஞ்சலிகள் இடம்பெற்றன.
இதேவேளை, வவுனியா நகரசபை மண்பத்தில் பிரஜைகள் குழு மற்றும் வலிந்து காணாமலாக்கப்பட்டவர்களின் ஏற்பாட்டில் மாவீர்களுக்கான அஞ்சலி முன்னெடுக்கப்பட்டிருந்தது.
மன்னார்
மன்னார் முள்ளிக்குளம் மாவீரர் துயிலுமில்லம், ஆட்காட்டிவெளி மாவீரர் துயிலுமில்லம் பண்டிவிரிச்சான் மாவீரர் துயிலுமில்லம் ஆகியவற்றிலும் அஞ்சலிகள் முன்னெடுக்கப்பட்டன.
கிளிநொச்சி
கனகபுரம் மாவீரர் துயிலுமில்லம், முழங்காவில் மாவீரர் துயிலுமில்லம் ஆகியவற்றில் மாவீரர்களுக்கான அஞ்சலி செலுத்தப்பட்டது.
முழங்காவில் மாவீரர் துயிலும் இல்லத்தில் நடைபெற்ற அஞ்சலி நிகழ்வில் கடற்கரும்புலி கோபி மற்றம் வீருவேங்களை இராஜேந்திரன் ஆகியோரின் தயார் சுப்பிரமணியம் சந்தனமலர் பிரதான சுடரேற்றி வைத்தார்.
அதேபோன்று கனபுரம் மாவீரர் துயிலுமில்லத்தில் பொதுச் சுடரினை, விடுதலைப் புலிகள் இயக்கத்தின் அரசியல் துறைப்பொறுப்பாளர் சு.ப.தமிழ்ச்செல்வனின் சகோதரரும், மூத்த போராளியுமான மூர்த்தி ஏற்றிவைத்தார். அதனையடுத்து ஏனையவர்கள் அஞ்சலியை மேற்கொண்டனர்.
இதேவேளை, கிளிநொச்சி சமத்துவக் கட்சி அலுவலகத்தில் போராளிகளின் ஏற்பாட்டில் மாவீரர் நாள் நிகழ்வுகள் உணர்வுபூர்வமாக இடம்பெற்றுள்ளன.
கட்சியின் மாவட்ட அமைப்பாளரும், முன்னாள் அரசியல்துறை போராளியுமான வேங்கை தலைமையில் இடம்பெற்ற மாவீரர் நாள் நிகழ்வில் மாவீரர்களான ஓளிவேங்கை மற்றும் ஓளியழகு ஆகியோரின் தாயார் பொதுச்சுடரை ஏற்றி வைக்க ஏனைய சுடர்களும் ஏற்றப்பட்டு மலர் அஞ்சலி செலுத்தப்பட்டது.
மண்ணுக்காய் மரணித்தவர்கள் நினைவு கூறப்பட்ட இந்நிகழ்வில் முன்னாள் பாராளுமன்ற உறுப்பினர் மு.சந்திரகுமார், கட்சியின் அமைப்பாளர்கள், முன்னாள் போராளிகள், மாவீரர்களின் பெற்றோர் உரித்துடையோர் கலந்துகொண்டனர்.
முல்லைத்தீவு
முள்ளியவளை மாவீரர் துயிலுமில்லம், விசுவமடு தேரவில் மாவீரர் துயிலுமில்லம், துணுக்காய் ஆலங்குளம் மாவீரர் துயிலுமில்லம், வன்னி விளாங்குளம் மாவீரர் துயிலுமில்லம், அளம்பில் மாவீரர் துயிலுமில்லம், மணலாறு புனிதபூமி மாவீரர் துயிலுமில்லம், மணலாறு உதயபீடம் மாவீரர் துயிலுமில்லம், களிக்காடு மாவீரர் துயிலுமில்லம், சுதந்திரபுர மாவீரர் துயிலுமில்லம், தேவிபுர மாவீரர் துயிலுமில்லம், இரணைப்பாலை மாவீரர் துயிலுமில்லம், பச்சைபுல்வெளி மாவீரர் துயிலுமில்லம், இரட்டைவாய்க்கால் மாவீரர் துயிலுமில்லம், முள்ளிவாய்க்கால் மாவீரர் துயிலுமில்லம் ஆகியவற்றில் ஏற்பாடு செய்யப்பட்ட அஞ்சலி நிகழ்வில் மக்கள் உணர்வு பூர்வமாக பங்கெடுத்திருந்தனர்
முல்லைத்தீவு தேராவில் மாவீரர் துயிலுமில்லத்தில் பிரிகேடியர் விதுஷா மற்றும் கப்டன் விதுஷன் ஆகியோரின் தயாரான கந்தையா ஞானாம்பிகை அம்மா பொதுச்சுடரை ஏற்றி வைத்திருந்தார்.
அளம்பில் மாவீரர் துயிலுமில்லத்தில் இரண்டு மாவீரர்களின் தாயாரான பண்டியன் ஞானஉதயம் பொதுச்சுடரை ஏற்றி வைத்ததோடு மாவீரர்களுக்கான அஞ்சலி செலுத்தப்பட்டது. இந்நிகழ்வில் வன்னிமாவட்ட பாராளுமன்ற உறுப்பினர் துரைராசா ரவிகரன் பங்கேற்றார்.
ஆனந்தபுரம் பச்சைபுல்மோட்டை துயிலுமில்லத்தில் கொட்டும் மழைக்கு மத்தியில் நடைபெற்ற அஞ்சலி நிகழ்வில் இரண்டு மாவீரர்களின் இரு தாயார்களான காவியநாயகி ஜெயஅலெக்ஸ் மற்றும் திருநாவுக்கரசு சரோஜினிதேவி ஆகியோர் இணைந்து பொதுச்சுடரினை ஏற்றியிருந்தனர்.
திருகோணமலை
திருமலை ஆலங்குளம் மாவீரர் துயிலுமில்லத்தில் மாவீரர்களுக்கான அஞ்சலி செலுத்தப்பட்டது. இதில் தங்கேஸ்வரன் நகேஷ்வரி என்ற மாவீரரின் தயார் பிரதான சுடலை ஏற்றிவைக்க அஞ்சலி உணர்வு ரீதியாக இடம்பெற்றது. இந்நினைவேந்தலில் தமிழ்த் தேசிய மக்கள் முன்னணியின் தலைவரும், யாழ்.மாவட்ட பாராளுமன்ற உறுப்பினருமான கஜேந்திரகுமார் பங்கேற்றிருந்தார்.
மட்டக்களப்பு
மட்டக்களப்பு தரவை மாவீரர் துயிலுமில்லம், தாண்டியடி மாவீரர் துயிலுமில்லம், வாகரை கண்டலடி மாவீரர் துயிலுமில்லம், மாவடி முன்மாரி துயிலுமில்லம் ஆகியவற்றிலும் மாவீரர்களுக்கு அஞ்சலி செலுத்தப்பட்டது.
இதன்போது மாவடி முன்மாரி துயிலுமில்லத்தில் இரு மாவீரர்களின் சகோதரியான பூமணி பிரதான சுடரை ஏற்றிவைத்திருந்தார்.
மட்டக்களப்பு தாண்டியடி துயிலுமில்லத்தில் நடைபெற்ற அஞ்சலி நிகழ்வில் பாராளுமன்ற உறுப்பினரான ஞானமுத்து ஸ்ரீநேசன், வவுனதீவு பிரதேச சபை தவிசாளர் கோபாலப்பிள்ளை, மண்முனை மேற்கு உப தவிசாளர் டிசான், முன்னாள் மட்ட மாநகர முதல்வர் சரவணபவான் மற்றும் மாநகர சபை உறுப்பினர்கள் பங்கெடுத்தனர்.
அம்பாறை
உடும்பன்குளம் மாவீரர் துயிலுமில்லத்தில் மாவீரர்களுக்கான அஞ்சலி செலுத்தப்பட்டது.
பாராளுமன்றில் அஞ்சலி
பாராளுமன்றத்தில் இலங்கைத் தமிழரசுக்கட்சியின் பாராளுமன்ற உறுப்பினர்களான இராசமாணிக்கம் சாணக்கியன் மற்றும் குகதாசன் ஆகியோர் மாவீரர்களுக்கான அஞ்சலியை செலுத்தினார்கள். கார்த்திகைப் பூ வடிவத்திலான படத்தினை வைத்து தமது அஞ்சலியை வெளிப்படுத்தினார்கள்.
கிழக்கு பல்கலை
இதேநேரம், கிழக்கு பல்கலைக்கழகத்திலும் மாவீரர்களுக்கான அஞ்சலி தமிழ் மாணவர்களின் பங்கேற்புடன் உணர்வு பூர்வமாக முன்னெடுக்கப்பட்டது. இதன்போது மாணவர்கள் சுடரேற்றி தமது அஞ்சலிகளை செலுத்தியிருந்தனர்.
புலம்பெயர் தேசங்களிலும் மாவீரர்களுக்கு அஞ்சலி
அவுஸ்திரேலியாவின் மெல்போர்னில் மாவீரர் தினம்; பர்வுட் ரிசர்வ் நகரில அனுஷ்டிக்கப்பட்டது. இதன்போது மாவீரர்களின் இலட்சிய வேட்கை நினைவுகூரப்பட்டு அஞ்சலிகள் நடைபெற்றன.
இதேநேரம், லண்டன், பிரான்ஸ், சுவிட்சர்லாந்து, ஜேர்மனி, அமெரிக்கா, பெல்ஜியம், நெதர்லாந்து, கனடா உள்ளிட்ட இடங்களிலும் தமிழ் மக்களின் அணிதிரள்வுடன் மாவீரர்களுக்கான அஞ்சலி உணர்வு ரீதியாக முன்னெடுக்கப்பட்டிருந்தது.
