ஆடையுற்பத்தி பணியாளர்களின் உரிமைகள் மிகமோசமாக மீறப்படுகின்றன: சர்வதேச மன்னிப்புச்சபை விசனம்
பல தசாப்தங்களாக ஆடைத்தொழிற்சாலைப் பணியாளர்களின் தொழிற்சங்க உரிமை உறுதிப்படுத்தப்படவில்லை எனவும், பெரும்பாலும் குறைந்தளவு சம்பளம், மிகையான வேலை நேரம் மற்றும் அதிக வேலைப்பளு போன்றவற்றினால் ஊழியர்கள் கடுமையான மீறல்களுக்கு உள்ளாகியிருப்பதாகவும் அவ்வறிக்கையில் சுட்டிக்காட்டப்பட்டுள்ளது.
இலங்கை, இந்தியா, பங்களாதேஷ் மற்றும் பாகிஸ்தான் போன்ற நாடுகளில் ஆடைத்தொழிற்சாலைப் பணியாளர்கள் மீதான தொடர் ஒடுக்குமுறைகள் மற்றும் அவர்களது உரிமைகள் மீறப்படல் என்பவற்றின் ஊடாக அரசாங்கங்கள், தொழிற்சாலைகள் மற்றும் நவீன ஆடையுற்பத்தி நிறுவனங்கள் பெருமளவுக்கு இலாபமடைந்திருப்பதாக சர்வதேச மன்னிப்புச்சபை சுட்டிக்காட்டியுள்ளது.
சர்வதேச மன்னிப்புச்சபையானது ஆடையுற்பத்தித் துறையில் பரந்துபட்ட அளவில் நிகழும் ஒடுக்குமுறைகள், தொழிலாளர் உரிமை மீறல்கள், தொழில் வழங்குனர்களால் நிகழ்த்தப்படும் அத்துமீறல்கள் போன்றவற்றை ஆவணப்படுத்தி 'பங்களாதேஷ், இந்தியா, பாகிஸ்தான் மற்றும் இலங்கையில் ஆடைத்தொழிற்சாலைப் பணியாளர்களுக்கு மறுக்கப்படும் ஒன்றுகூடுவதற்கான சுதந்திரம்' மற்றும் 'நவீன ஆடையுற்பத்தி நிறுவனங்கள் தொழிலாளர்கள் உரிமைகளைப் பாதுகாக்கவேண்டியதன் உடனடித் தேவைப்பாடு' ஆகிய தலைப்புக்களில் இருவேறு அறிக்கைகளை வெளியிட்டுள்ளது.
பல தசாப்தங்களாக ஆடைத்தொழிற்சாலைப் பணியாளர்களின் தொழிற்சங்க உரிமை உறுதிப்படுத்தப்படவில்லை எனவும், பெரும்பாலும் குறைந்தளவு சம்பளம், மிகையான வேலை நேரம் மற்றும் அதிக வேலைப்பளு போன்றவற்றினால் ஊழியர்கள் கடுமையான மீறல்களுக்கு உள்ளாகியிருப்பதாகவும் அவ்வறிக்கையில் சுட்டிக்காட்டப்பட்டுள்ளது.
அத்தோடு பெரும்பாலும் மேற்குலக நவீன ஆடையகப் பங்காளிகளின் இலாபமீட்டல் நோக்கத்துக்காக பங்களாதேஷ், இந்தியா, பாகிஸ்தான் மற்றும் இலங்கை ஆகிய நாடுகளின் ஆடையுற்பத்தி துறைப் பணியாளர்களின் உரிமைகளைப் பணயம் வைக்கும் ஒட்டுமொத்த வர்த்தக மாதிரியின் மீதும் இக்குற்றச்சாட்டை முன்வைப்பதாக அதில் குறிப்பிடப்பட்டுள்ளது.
அதேபோன்று மேற்குறிப்பிட்ட 4 நாடுகளையும் சேர்ந்த ஆடைத்தொழிற்சாலைப் பணியாளர்கள், பின்விளைவுகள் ஏற்படக்கூடும் என தொழில் வழங்குனர்களால் விடுக்கப்பட்ட அச்சுறுத்தல் காரணமாக தொழிற்சங்கத்தில் இணையவில்லலை எனத் தெரிவித்துள்ளதாக அவ்வறிக்கையில் தெரிவிக்கப்பட்டுள்ளது.
2023 செப்டெம்பர் - 2024 ஓகஸ்ட் வரையான காலப்பகுதியில் மேற்படி 4 நாடுகளிலும் உள்ள 20 ஆடைத்தொழிற்சாலைகளில் மேற்கொள்ளப்பட்ட 88 நேர்காணல்களுக்கு அமைவாகவே இந்த இரண்டு அறிக்கைகளும் தயாரிக்கப்பட்டுள்ளமை குறிப்பிடத்தக்கது.
