பிரதமருடன் வெளிநாட்டு இராஜதந்திரிகள் சந்திப்பு
சீரற்ற காலநிலையினால் பாதிக்கப்பட்ட சமூகங்களை மீட்டல் மற்றும் பாதுகாப்பை உறுதிசெய்தல் என்பன தொடர்பில் இதன்போது விசேட கவனம் செலுத்தப்பட்டதுடன் தற்போது முன்னெடுக்கப்பட்டுவரும் மீட்பு நடவடிக்கைகள் குறித்து விளக்கமளிக்கப்பட்டது.
சீரற்ற காலநிலையின் விளைவாக இலங்கை பாரிய நெருக்கடிக்கு முகங்கொடுத்திருக்கும் தற்போதைய சூழ்நிலையில் இலங்கை அரசாங்கத்துக்குத் தமது முழுமையான ஒத்துழைப்பையும் ஆதரவையும் வழங்கத் தயாராக இருப்பதாக பிரதமர் ஹரினி அமரசூரியவுடனான சந்திப்பில் வெளிநாடுகளின் தூதுவர்களும், இராஜதந்திரிகளும் உறுதியளித்துள்ளனர்.
நாட்டில் நிலவும் சீரற்ற காலநிலையினால் ஏற்பட்டிருக்கும் பாதிப்புக்கள், நிவாரண நடவடிக்கைகள் மற்றும் மீட்பு முயற்சிகள் குறித்து கொழும்பிலுள்ள வெளிநாட்டுத் தூதுவர்கள் மற்றும் இராஜதந்திரிகளுக்கு விளக்கமளிக்கும் நோக்கிலான கூட்டமொன்று நேற்று வெள்ளிக்கிழமை (28) பிரதமர் ஹரினி அமரசூரிய தலைமையில் பிரதமர் அலுவலகத்தில் ஏற்பாடு செய்யப்பட்டிருந்தது.
இக்கூட்டத்தில் வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித்த ஹேரத்தும் பங்கேற்றிருந்ததுடன் அமெரிக்கா, பிரிட்டன், ஐரோப்பிய ஒன்றியம் உள்ளடங்கலாக இலங்கையிலுள்ள சர்வதேச நாடுகளின் தூதுவர்கள் மற்றும் உயர்ஸ்தானிகர்கள் கலந்துகொண்டிருந்தனர்.
சீரற்ற காலநிலையினால் பாதிக்கப்பட்ட சமூகங்களை மீட்டல் மற்றும் பாதுகாப்பை உறுதிசெய்தல் என்பன தொடர்பில் இதன்போது விசேட கவனம் செலுத்தப்பட்டதுடன் தற்போது முன்னெடுக்கப்பட்டுவரும் மீட்பு நடவடிக்கைகள் குறித்து விளக்கமளிக்கப்பட்டது.
அதன்படி 'இச்சவாலான நேரத்தில் கொழும்பில் உள்ள பெரும்பாலான இராஜதந்திர தூதரகங்கள் இலங்கை அரசாங்கத்துக்குத் தமது ஒத்துழைப்பையும் ஆதரவையும் வெளிப்படுத்தியுள்ளன. மனிதாபிமான உதவி வழங்கலை எளிதாக்குவதிலும், தற்போதைய நிவாரணம் மற்றும் மீட்பு முயற்சிகளுக்குப் பங்களிப்பதிலும் இலங்கை அதிகாரிகளுடன் நெருங்கிப் பணியாற்றுவதற்குத் தயாராக இருப்பதாகத் தூதரகங்கள் தெரிவித்துள்ளன' என வெளிவிவகார அமைச்சு அதன் அறிக்கையில் குறிப்பிட்டுள்ளது.
மேலும் வெளிநாடுகளில் உள்ள இலங்கைத் தூதரகங்கள் மற்றும் கொழும்பைத் தளமாகக்கொண்ட இராஜதந்திரத் தூதரகங்கள் ஆகியவற்றுடனான ஒருங்கிணைப்புக்கென அவசரகால நடவடிக்கைப் பிரிவொன்று நிறுவப்பட்டிருப்பதாகவும் வெளிவிவகார அமைச்சு தெரிவித்துள்ளது.
