பிக்கரிங் கட்டுமானப் பகுதியில் கார் மோதியதில் இரு தொழிலாளர்கள் படுகாயம்
அங்கு பணியில் ஈடுபட்டிருந்த 22 வயதுடைய பெண் தொழிலாளி மீதும், 58 வயதுடைய ஆண் தொழிலாளி மீதும் கார் மோதியது.
கனடாவின் ஒன்ராறியோ மாகாணத்தில் உள்ள பிக்கரிங் நகரில், கட்டுமானப் பகுதியில் கார் மோதியதில் இரு தொழிலாளர்கள் படுகாயமடைந்தனர். அவர்கள் இருவரும் உயிருக்கு ஆபத்தான நிலையில் மருத்துவமனையில் அனுமதிக்கப்பட்டுள்ளதாக டர்ஹாம் பிராந்திய காவல்துறையினர் தெரிவித்துள்ளனர்.
வெள்ளிக்கிழமை காலை சுமார் 11 மணியளவில், கிங்ஸ்டன் மற்றும் லிவர்பூல் சாலைகளுக்கு அருகிலுள்ள பிக்கரிங் சிட்டி சென்டர் வணிக வளாகத்தின் அருகே இந்த விபத்து நிகழ்ந்துள்ளது.
டெஸ்லா காரை ஓட்டிச் சென்ற 75 வயது முதியவர், வாகன நிறுத்துமிடத்தில் காரை அதிவேகமாகச் செலுத்தியுள்ளார். அப்போது கட்டுப்பாட்டை இழந்த கார், அங்கிருந்த வேலியை உடைத்துக்கொண்டு கட்டுமானப் பகுதிக்குள் புகுந்துள்ளது.
அங்கு பணியில் ஈடுபட்டிருந்த 22 வயதுடைய பெண் தொழிலாளி மீதும், 58 வயதுடைய ஆண் தொழிலாளி மீதும் கார் மோதியது. இந்த விபத்தில் இருவருக்கும் உயிருக்கு ஆபத்தை ஏற்படுத்தக்கூடிய வகையில் பலத்த காயங்கள் ஏற்பட்டுள்ளதாக காவல்துறையினர் தெரிவித்துள்ளனர்.
விபத்தில் காயமடைந்த பெண் தொழிலாளி, விமான ஆம்புலன்ஸ் மூலம் ரொறன்ரோவில் உள்ள ஒரு மருத்துவமனைக்குக் கொண்டு செல்லப்பட்டார். ஆண் தொழிலாளி அருகிலுள்ள மருத்துவமனையில் அனுமதிக்கப்பட்டார். விபத்துக்கான காரணம் இன்னும் கண்டறியப்படவில்லை. இதுகுறித்து காவல்துறையினர் தொடர்ந்து விசாரணை நடத்தி வருகின்றனர்.
