உயர்தர, போட்டிப்பரீட்சைகள் இடைநிறுத்தம் அரச அலுவலகங்களுக்கும் விசேட விடுமுறை
இப்பரீட்சைகள் முறையே டிசம்பர் 13 மற்றும் 14ஆம் திகதிகளில் இடம்பெறும் என அறிவிக்கப்பட்டுள்ளது.
சீரற்ற காலநிலையால் ஏற்பட்டுள்ள மோசமான பாதிப்புக்களைக் கருத்திற் கொண்டு கல்விப் பொதுத் தராதர உயர் தர பரீட்சைகள், ஏனைய போட்டிப்பரீட்சைகள் அனைத்தும் இடை நிறுத்தப்பட்டுள்ளன.
அத்தோடு முன்பள்ளிகளும் மூடப்படுவதாக அறிவிக்கப்பட்டுள்ளதோடு, சர்வதேச பாடசாலைகளுக்கும் விடுமுறை வழங்குமாறு கல்வி அமைச்சு ஆலோசனை வழங்கியுள்ளது. மேலும் இன்றைய தினம் சகல அரச அலுவலகங்களுக்கும் விசேட விடுமுறை வழங்கப்படுவதாக பொது நிர்வாக அமைச்சு அறிவித்துள்ளது.
நேற்று முதல் 3 தினங்களுக்கு உயர்தர பரீட்சைகள் இடைநிறுத்தப்பட்டுள்ளன. குறித்த மூன்று தினங்களிலும் நடத்துவதற்கு திட்டமிடப்பட்டிருந்த பரீட்சைகள் முறையே டிசம்பர் 7, 8 மற்றும் 9ஆம் திகதிகளில் நடைபெறும் என பரீட்சைகள் ஆணையாளர் நாயகம் ஏ.கே.எஸ்.இந்திகா குமாரி லியனகே தெரிவித்தார்.
எவ்வாறிருப்பினும் ஏற்கனவே திட்டமிடப்பட்ட நேர அட்டவணைக்கமைய ஏனைய பரீட்சைகள் திங்கட்கிழமை முதல் இடம்பெறும் என்றும், குறித்த மூன்று தினங்களில் திட்டமிடப்பட்டிருந்த பரீட்சைகளை நடத்துவதற்கான தினங்களில் மாத்திரமே மாற்றங்கள் ஏற்படுத்தப்பட்டுள்ளன என்றும் பரீட்சைகள் ஆணையாளர் தெரிவித்துள்ளார். காலநிலை மாற்றத்தைக் கருத்திற்கொண்டு அதற்கமையவே அடுத்த கட்ட நடவடிக்கைகள் முன்னெடுக்கப்படும் என அவர் மேலும் தெரிவித்துள்ளார்.
போட்டிப்பரீட்சைகள் இவ்வார இறுதியில் நடைபெறவிருந்த சில போட்டிப்பரீட்சைகள் பிற்போடப்பட்டுள்ளதாக பரீட்சை திணைக்களம் அறிவித்துள்ளது. பதிவாளர் நாயகம் திணைக்களத்தின் சேவையில் வகுப்பு 1 தரம் 3 இற்கு மட்டுப்படுத்தப்பட்ட அடிப்படையில் ஆட்சேர்ப்பு செய்வதற்கான போட்டிப்பரீட்சை மற்றும் கல்வி, உயர்கல்வி மற்றும் தொழிற்கல்வி அமைச்சின் முகாமைத்துவ உதவியாளர் தொழிநுட்பமல்லாத (கட்டம் 2) தரம் 3 விளையாட்டு பயிற்றுவிப்பாளர்களுக்கான முதலாவது வினைத்திறன் தடை தாண்டல் பரீட்சை என்பன பிற்போடப்பட்டுள்ளன. இப்பரீட்சைகள் முறையே டிசம்பர் 13 மற்றும் 14ஆம் திகதிகளில் இடம்பெறும் என அறிவிக்கப்பட்டுள்ளது.
மேலும் இலங்கை தென்கிழக்கு பல்கலைக்கழக வெளிவாரிப்பட்டப்படிப்புக்கள் மற்றும் தொழிற்சார் கற்கைகள் நிலையத்தினால் நாளை சனிக்கிழமை நடைபெறவிருந்த கலைமாணி (பொது) வெளிவாரிப்பட்டப்படிப்பிற்குரிய 2022ஃ2023 நுழைவுப்போட்டிப்பரீட்சையும் ஒத்தி வைக்கப்பட்டுள்ளது.
பாலர் பாடசாலை/முன்பள்ளி சீரற்ற காலநிலை குறைவடையும் வரை இன்று முதல் நாடளாவிய ரீதியில் அனைத்து பாலர் பாடசாலைகளுக்கும், முன்பள்ளி பருவ அபிவிருத்தி நிலையங்களுக்கும் மூடப்படும் என முன்பிள்ளைப்பருவ அபிவிருத்திக்கான தேசிய செயலகம் அறிவித்துள்ளது.
