கொழும்பு வெள்ளத்தால் மூழ்கும் அபாயம்
நில்வளா கங்கை ஆபத்தான நிலைமையில் இல்லை. வெஹெரகல மற்றும் மாணிக்க கங்கையை அண்மித்த பகுதிகளில் வெள்ளம் ஏற்படக் கூடும் என்றார்.
களனி கங்கையின் நீர் மட்டம் அதிகரிப்பதால் கொழும்பில் பாரிய வெள்ளப்பெருக்கு ஏற்படக் கூடும். 2016ஆம் ஆண்டுக்கு பின்னர் ஏற்படும் மிகப் பெரிய வெள்ள அனர்த்தமாக இது பதிவாகும். எனவே களனி கங்கையை அண்மித்த பகுதிகளில் வசிப்போர் உடனடியாக பாதுகாப்பான இடங்களுக்குச் செல்லுமாறும், தமது கல்வி சான்றிதழ்கள் உள்ளிட்ட அத்தியாவசிய முக்கிய ஆவணங்களை பத்திரப்படுத்துமாறு அறிவுறுத்தப்படுவதாக நீர்ப்பாசன திணைக்களத்தின் பணிப்பாளர் நாயகம் அஜித் குணசேகர தெரிவித்தார்.
இராணுவத் தலைமையகத்தில் நேற்று வெள்ளிக்கிழமை இடம்பெற்ற ஊடகவியலாளர் மாநாட்டில் இதனைத் தெரிவித்த அவர் மேலும் குறிப்பிடுகையில், நீர்ப்பாசன திணைக்களத்தின் கீழ் காணப்படும் சுமார் 50க்கும் மேற்பட்ட பாரிய நீர்த்தேக்கங்களின் வான் கதவுகள் திறக்கப்பட்டுள்ளன. அதேபோன்று சாதாரண நீர்த்தேக்கங்களின் வான் கதவுகளும் திறக்கப்பட்டுள்ளன. தெதுருஓயா நீர்த்தேக்கத்திலேயே அதி கூடிய நீர் மட்டம் பதிவானது.
எனினும் தற்போது (நேற்று காலை) நிலைமை சற்று வழமைக்கு திரும்பியது. எனவே அதனால் அபாய நிலைமை இல்லை. எவ்வாறிருப்பினும் செக்கனுக்கு இலட்சம் கன மீற்றர் வேகத்தில் நீர் வெளியேற்றப்படுகிறது. இதனால் பாதெனிய - அநுராதபுரம் வீதி முற்றாக நீரில் மூழ்கியுள்ளது.
அநுராதபுரத்தில் நாச்சியாதூவ நீர்த்தேக்கம் உள்ளிட்டவற்றிலும் வான் கதவுகள் திறக்கப்பட்டுள்ளன. இதனால் அநுராதபுரம் நகரத்தை அண்மித்த பகுதிகள் நீரில் மூழ்கியுள்ளன. புத்தளத்தில் இங்கினிமிட்டிய மற்றும் தப்போவா நீர்த்தேக்கங்களில் வான் கதவுகள் திறக்கப்பட்டுள்ளதால் அநுராதபுரம் வீதி மற்றும் புத்தளம் நகர் நீரில் மூழ்கியுள்ளது. தெதுருஓயா நீர்த்தேக்கத்தின் வான் கதவுகள் திறக்கப்பட்டுள்ளதால் சிலாபம் நகர் நீரில் மூழ்கக் கூடிய வாய்ப்புள்ளது.
யான் ஓயா, பதவிய நீர்த்தேக்கங்களின் நீர் மட்டம் உயர்வடைந்துள்ளதால் ஹொரவ்பொத்தான, கெப்பிதிகொல்லாவ, பதவிஸ்ரீபுர பிரதேசங்கள் நீரில் மூழ்கியுள்ளன. சேனாநாயக்க சமுத்திரத்தின் வான் கதவுகள் திறக்கப்படா போதிலும், அதன் நீர் மட்டமும் உயர்வடைந்துள்ளது. கல்ஓயா முழுமையாக நீரில் மூழ்கியுள்ளது. சேனாநாயக்க சமுத்திரத்தின் வான் கதவுகள் திறக்கப்பட்டால் வயல் முற்றாக நீரில் மூழ்கும். எனவே மழை வீழ்ச்சி சற்று குறைவடையும் வரை காத்திருக்கின்றோம்.
களனி கங்கையின் நீர் மட்டமானது 2016ஐ விட அதிகரித்துள்ளது. இதன் காரணமாக இன்று சனிக்கிழமை இரவு கொழும்பில் பாரிய வெள்ள நிலைமை ஏற்படும் என எதிர்பார்க்கப்படுகிறது. எனவே கொழும்பில் வசிப்போர் தமது கல்வி சான்றிதழ்கள், வாகனங்கள் உள்ளிட்ட அத்தியாவசியமானவற்றைப் பாதுகாப்பதற்கான முன்னெச்சரிக்கை நடவடிக்கைகளை முன்னெடுக்குமாறு அறிவுறுத்தப்படுகின்றனர்.
இவை தவிர கின் கங்கையின் நீர் மட்டமும் உயர்வடையக் கூடும். நில்வளா கங்கை ஆபத்தான நிலைமையில் இல்லை. வெஹெரகல மற்றும் மாணிக்க கங்கையை அண்மித்த பகுதிகளில் வெள்ளம் ஏற்படக் கூடும் என்றார்.
இதேவேளை இது குறித்து நேற்றைய தினம் கொழும்பு டேம் வீதியிலுள்ள பிரதேச செயலகத்தில் மேல் மாகாண ஆளுநர் தலைமையில் விசேட கலந்துரையாடலொன்றும் இடம்பெற்றது. அதற்கமைய மட்டக்குளி, முகத்துவாரம், மாவத்தை, மாதம்பிட்டி உள்ளிட்ட பகுதிகளிலுள்ளவர்கள் உடனடியாக அங்கிருந்து பாதுகாப்பான இடங்களுக்கு செல்லுமாறு பணிப்புரை விடுக்கப்பட்டது. கொழும்பு மாநகரசபையால் தங்குமிட வசதிகள் ஏற்படுத்திக் கொடுக்கப்பட்டுள்ளதாகவும், அங்கு உணவு உள்ளிட்ட அத்தியாவசிய சேவைகள் வழங்கப்படும் என்றும் தெரிவிக்கப்பட்டுள்ளது.
