‘தித்வா’ புயலின் தாக்கத்தினால் 69 உயிரிழப்புக்கள்
கேகாலையில் எட்டு பேர் உயிரிழந்துள்ளதோடு, இருவர் காணாமல் போயுள்ளனர். கண்டியில் நால்வர் உயிரிழந்துள்ளதோடு, 19 பேர் காணாமல் போயுள்ளனர்.
வங்காள விரிகுடாவில் ஏற்பட்ட ‘தித்வா’ புயலின் தாக்கத்தினால் நாட்டின் சகல மாவட்டங்களிலும் பாரதூரமான பாதிப்புக்கள் பதிவாகியுள்ளன. தித்வா புயல் ஏற்படுத்திய இயற்கை சீற்றங்களால் நேற்று வெள்ளிக்கிழமை இரவு 8 மணி வரையில் 69 உயிரிழப்புக்கள் பதிவாகியுள்ளதோடு, 34 பேர் காணாமல் போயுள்ளனர். அத்தோடு 61,175 குடும்பங்களைச் சேர்ந்த, 2,19,285 பேர் பாதிக்கப்பட்டுள்ளனர். 5,890 குடும்பங்களைச் சேர்ந்த 18,443 பேர் 266 தற்காலிக பாதுகாப்பு முகாம்களில் தங்க வைக்கப்பட்டுள்ளதாக அனர்த்த முகாமைத்துவ மத்திய நிலையம் தெரிவித்துள்ளது.
இம்முறை பதுளை மாவட்டத்திலேயே அதிகளவான உயிரிழப்புக்கள் பதிவாகியுள்ளன. இம்மாவட்டத்தில் 30 பேர் உயிரிழந்துள்ளதோடு நால்வர் காணாமல் போயுள்ளனர். மாத்தளையில் எட்டு பேர் உயிரிழந்துள்ளதோடு, இருவர் காணாமல் போயுள்ளனர். கேகாலையில் எட்டு பேர் உயிரிழந்துள்ளதோடு, இருவர் காணாமல் போயுள்ளனர். கண்டியில் நால்வர் உயிரிழந்துள்ளதோடு, 19 பேர் காணாமல் போயுள்ளனர். நுவரெலியாவில் அறுவர் உயிரிழந்துள்ளதோடு, நால்வர் காணாமல் போயுள்ளனர். காலியில் ஒருவர் உயிரிழந்துள்ளதோடு, இருவர் காணாமல் போயுள்ளனர். மொனராகலையில் இருவரும், அநுராதபுரத்தில் ஒருவரும், அம்பாறையில் ஐவரும், குருணாகலில் மூவரும் உயிரிழந்துள்ளனர், அம்பாந்தோட்டையில் ஒருவர் உயிரிழந்துள்ளதோடு மட்டக்களப்பில் ஒருவர் காணாமல் போயுள்ளார்.
கம்பஹா மாவட்டத்தில் மாத்திரம் வெள்ளம் காரணமாக 70,000க்கும் மேற்பட்டோர் பாதிக்கப்பட்டுள்ளனர். இம்மாவட்டத்தில் 17,465 குடும்பங்களைச் சேர்ந்த 71,443 பேர் பாதிக்கப்பட்டுள்ளனர். இதேபோன்று புத்தளத்தில் 9,937 குடும்பங்களைச் சேர்ந்த 36,574 பேரும், அம்பாறையில் 6,412 குடும்பங்களைச் சேர்ந்த 20,377 பேரும், பொலன்னறுவையில் 4,218 குடும்பங்களைச் சேர்ந்த 14,943 பேரும், மட்டக்களப்பில் 4,475 குடும்பங்களைச் சேர்ந்த 14,049 பேரும், திருகோணமலையில் 3,844 குடும்பங்களைச் சேர்ந்த 11,350 பேரும் பாதிக்கப்பட்டுள்ளனர்.
இதேபோன்று பதுளை, மொனராகலை, மாத்தளை, கொழும்பு, கேகாலை, அநுராதபுரம், கண்டி, இரத்தினபுரி, குருணாகல், அம்பாந்தோட்டை மற்றும் வவுனியா மாவட்டங்களில் 3,000 – 6,000 பேர் வரையில் பாதிக்கப்பட்டுள்ளனர்.
அநுராதபுரத்தில் இராஜாங்கனை, அங்கம, கலாவெவ நீர்த்தேக்கங்களில் 26 வான்கதவுகளும், குருணாகலில் தெதுருஓயா நீர்த்தேக்கத்தில் 8 வான்கதவுகளும், கண்டியில் பொல்கொல்ல நீர்த்தேக்கத்தில் 3 வான்கதவுகளும், மொனராகலையில் வெஹெரகல நீர்த்தேக்கத்தில் 6 வான்கதவுகளும், மாத்தளையில் போவதென்ன நீர்த்தேக்கத்தில் 6 வான்கதவுகளும், கண்டி - ரன்டெம்ப நீர்த்தேக்கத்தில் 2 வான்கதவுகளும், பதுளை - உல்ஹிட்டிய நீர்த்தேக்கத்தில் 7 வான்கதவுகளும், களுத்துறை - குகுலேகங்க நீர்த்தேக்கத்தில் 2 வான்கதவுகளும், அம்பாந்தோட்டை - லுணுகம்வெஹர நீர்த்தேக்கத்தில் 6 வான்கதவுகளும் திறக்கப்பட்டுள்ளன.
